उच्च अदालत जनकपुरमा दुई वर्षभन्दा पुरानो मुद्दा शून्यमा

जनकपुरधाम– उच्च अदालत जनकपुरमा दुई वर्षभन्दा पुरानो मुद्दा शून्यमा झरेको छ।

अदालतले सार्वजनिक गरेको तथ्यांक अनुसार दुई वर्ष नाघेको मुद्दा शून्यमा झरेको छ भने १८ महिनादेखि दुई वर्षभित्रको मुद्दाको संख्या १३ वटा रहेको छ। यस्तै, एक वर्षदेखि डेढ वर्षभित्रको बाँकी मुद्दा ३८७ वटा रहेको छ।

दश जना न्यायाधीश रहेको उच्च अदालत जनकपुरले चालु आर्थिक वर्ष २०८२।८३ को असार १९ गतेसम्ममा कुल ४ हजार ३३० वटा मुद्दा फछर्यौट गरेको हो। जसमध्ये ४ हजार १६१ वटा नयाँ मुद्दा दर्ता छ भने २ हजार २६७ वटा जिम्मेवारी सरी आएको मुद्दा हो।

अदालतका रजिष्ट्रार विश्वजंग सिजापतिका अनुसार जिम्मेवारी सरी आएको र नयाँ दर्ता मुद्दामध्ये २ हजार ९८ वटा फछर्यौट हुन बाँकी छ। जिम्मेवारी सरी आएको मध्ये २ हजार ४७ वटा फर्छौट भएको छ भने २२० वटा बाँकी छ। यस्तै, नयाँ दर्तामध्ये २ हजार २८३ वटा फछर्यौट भएको छ भने १ हजार ८७८ वटा मुद्दा बाँकी छ।

उच्चले यस आर्थिक वर्षको फछर्यौट लक्ष्य ४ हजार ५४६ वटा राखेकोमा असार १९ गतेसम्म ४ हजार ३३० रहेको छ। यो लक्ष्यको ९५.२४ प्रतिशत हो।

उच्चको तथ्यांक अनुसार चालु आव २०८२।८३ को असार १९ गतेसम्ममा सबैभन्दा बढी कायम मुकायम मुख्य न्यायाधीश टेकनारायण कुँवरले मुद्दाको फछर्यौट गरेका हुन्। उनको इजलाशले १ हजार ३१० वटा मुद्दाको फछर्यौट गरेको छ।

यसैगरि, न्यायाधीश टीकाराम आचार्यले १ हजार ११५, जगदिश घिमिरेले ९४६, राजुराम सिलवालले ८९६, कृष्णप्रसाद सुवेदीले ८४६, कैलासप्रसाद सुवेदीले ८२६, फुर्पा तामाङले ७२३, मुरारीबाबु श्रेष्ठले ६८४, कमलप्रसाद पोखरेलले ६५९ र श्यामकुमार भट्टराईले ५७८ मुद्दाको पछर्यौट गरेका हुन्।