- अमेरिकी सेनाले बुधबार स्ट्रेट अफ हर्म्युजमा इरानमाथि थप आक्रमण गर्दै यातायातको स्वतन्त्रता सुनिश्चित गर्न कदम चालेको छ।
- राष्ट्रपति ट्रम्पले इरानको जहाजमाथि गरेको आक्रमणको बदला लिने चेतावनी दिँदै, यस प्रकारको आक्रमण नदोहो-रिन आग्रह गरेका छन्।
- इरानी वार्ताकारले धम्कीको युग सकिएको भन्दै, जलडमरूमध्यमा आफ्नो अधिकारको बचाऊ गर्ने अडान लिएका छन्।
अमेरिकी राष्ट्रपति डोनाल्ड ट्रम्पले युद्ध अन्त्य गर्ने एउटा अन्तरिम सम्झौता “सकिएको” बताएको केही घण्टापछि नै अमेरिकी सेनाले बुधबार इरानमाथि अर्को चरणको आक्रमण गरेको छ।
इरानी सरकारी सञ्चारमाध्यमका अनुसार स्ट्रेट अफ हर्म्युजमा अवस्थित बन्दरगाह सहर बन्दार अब्बास, अर्को दक्षिणी तटीय सहर सिरिक र इरानको आणविक ऊर्जा केन्द्र रहेको दक्षिण-पश्चिमी बुशेहर प्रान्तमा विस्फोटहरू भएका छन्।
चाबाहारमा भएको भनिएको एउटा विस्फोटको तस्बिर सेयर गर्दै ट्रम्पले ट्रुथ सोसलमा लेखेका छन्: “यो हिजो इरानद्वारा जहाजहरूमाथि गरिएको बमबारीको बदला हो। यदि यस्तो फेरि दोहोरियो भने, परिणाम अझ गम्भीर हुनेछ!”
अमेरिकी सेन्ट्रल कमान्डले उक्त आक्रमणको पुष्टि गर्दै एक्समा पोस्ट गरेको छ: “कमान्डर इन चीफको निर्देशनमा, अमेरिकी सेन्ट्रल कमान्डका सेनाले स्ट्रेट अफ हर्म्युजमा जलयात्राको स्वतन्त्रतालाई जोखिममा पार्ने इरानको क्षमतालाई थप कमजोर बनाउनका लागि त्यहाँ थप आक्रमणहरू सुरु गरेका छन्।”
“एउटा महत्त्वपूर्ण अन्तर्राष्ट्रिय जलमार्गमा स्वतन्त्र रूपमा चलिरहेका व्यापारिक जहाज र नागरिक चालक दलमाथि हालै इरानले गरेको अनुचित आक्रामक व्यवहारका लागि संयुक्त राज्य अमेरिकाले उसलाई जिम्मेवार ठहराउँदै छ।”
बुधबार रातिको आक्रमण मंगलबार गरिएको आक्रमणभन्दा ठुलो हुने अपेक्षा गरिएको एक अज्ञात अमेरिकी अधिकारीले रोयटर्सलाई बताए।
इरानी सरकारी टेलिभिजनका अनुसार अबु मुसा टापुमा थप विस्फोटका आवाजहरू सुनिएका छन्। संयुक्त अरब इमिरेट्सले दाबी गर्दै आएका तीनवटा साना टापुहरूमध्ये यो पनि एक हो, जसले स्ट्रेट अफ हर्म्युजमा इरानको नियन्त्रणका लागि मुख्य आधारको रूपमा काम गर्छ।
इरानको मेहर समाचार एजेन्सीका अनुसार दक्षिणी इरानको बुशेहर प्रान्तमा भएका यी आक्रमणहरूबाट बुशेहर आणविक ऊर्जा केन्द्रमा कुनै क्षति पुगेको छैन।
अमेरिकी सिनेटर बर्नी स्यान्डर्सले ट्रम्पको यस कदमबारे टिप्पणी गर्दै भनेका छन्, “इरानसँगको यो लापरवाह युद्धलाई पुनः ब्युँताउँदा अमेरिका बलियो हुनेछैन। यसले थप ज्यान लिनेछ र करदाताहरूको पैसा मात्र बर्बाद गर्नेछ।”
एक्समा एक पोस्ट थप्दै स्यान्डर्सले भने, “झुटको जगमा अमेरिकालाई युद्धमा होमेपछि, ट्रम्पले एक महिनाभन्दा कम समयमै इरानसँगको युद्धविराम ‘सकिएको’ घोषणा गरेका छन्।”
ओमानको तटनजिकै धेरै व्यापारिक जहाजहरूलाई इरानले निशाना बनाएपछि मंगलबार अमेरिकाले विभिन्न सैन्य क्षेत्र र बन्दरगाह सुविधाहरूमा आक्रमण गरेको थियो।
यसअघि अंकारामा आयोजित नाटो शिखर सम्मेलनमा ट्रम्पले अमेरिकाले “सायद आज राति पनि इरानमाथि कडा प्रहार गर्ने” बताएका थिए, र पछि थपे कि यी पछिल्ला आक्रमणहरू “दीर्घकालीन” सैन्य कारबाहीमा परिणत हुने छैनन्।
“जे हुनु छ, त्यो निकै तीव्र गतिमा हुनेछ,” ट्रम्पले भने, यद्यपि उनले अमेरिकी सेनाले “यो काम पूर्ण रूपमा सिध्याउन” सक्ने संकेत पनि गरे।
शिखर सम्मेलनको साइडलाइनमा बोल्दै अमेरिकी राष्ट्रपतिले स्ट्रेट अफ हर्म्युजमा व्यापारिक जहाजहरूमाथि इरानी हमलाहरूको बदलास्वरूप यो आक्रमण जारी राखिएको बताए।
“उनीहरूले निकै नराम्रो व्यवहार गरिरहेका छन्,” उनले इरानमाथि जहाजहरूमा ड्रोन र मिसाइल प्रहार गरेको आरोप लगाउँदै भने।
इरानले भने अन्तरिम युद्धविराम सम्झौताले आफूलाई उक्त स्ट्रेट (जलडमरूमध्ये) भएर हुने आवतजावतलाई व्यवस्थित गर्ने अधिकार दिएको दाबी गरेको छ।
युद्धको स्थायी अन्त्यका लागि भइरहेको वार्ताका प्रमुख वार्ताकार एवं इरानको संसदका सभामुख मोहम्मद बगेर गालिबाफले एक्समा लेखेका छन्, “धम्की र जबर्जस्ती असुलीको युग अब सकिएको छ। यसले कतै पुर्याउँदैन। हामी झुक्ने छैनौँ।”
भर्खरै
लोकप्रिय
