- कैलालीका डीएसपी प्रसन्नराज चौधरीलाई बालेनको पुलिस होइन भन्ने अभिव्यक्तिबारे सोधपुछ गर्न जिल्ला बोलाइएको छ ।
- उनले लागूऔषध सचेतना कार्यक्रममा प्रहरीको निष्पक्ष भूमिकाबारे धारणा राख्दै विभिन्न प्रसङ्ग उठाएका थिए ।
- सामाजिक सञ्जालमा भाइरल भएको भिडियोका कारण डीएसपी चौधरीसँग अन्य गुनासोहरूबारे पनि सोधपुछ गरिनेछ ।
धनगढी- बालेनको पुलिस होइन भन्ने अभिव्यक्ति दिएका डीएसपीलाई जिल्ला बोलाएर सोधपुछ गरिँदैछ ।
कैलालीको इलाका प्रहरी कार्यालय सुखडका प्रमुख प्रहरी नायब उपरीक्षक (डीएसपी) प्रसन्नराज चौधरीलाई सार्वजनिक कार्यक्रममा दिएको अभिव्यक्तिबारे स्पष्टीकरण लिन जिल्ला प्रहरी कार्यालय बोलाइएको हो ।
घोडाघोडी नगरपालिका- ५, दरखमा आयोजित लागूऔषध सचेतना कार्यक्रममा उनले ‘हामी बालेनको पुलिस होइन, नेपाल पुलिस हो’ भन्दै दिएको अभिव्यक्ति सामाजिक सञ्जालमा भाइरल भएपछि जिल्ला प्रहरी कार्यालय कैलालीले उनीसँग सोधपुछ गर्न जिल्ला बोलाएको बताइएको छ ।
कैलालीका प्रहरी प्रमुख प्रहरी उपरीक्षक नरेन्द्र चन्दले डीएसपी चौधरीलाई घटनाबारे सामान्य बुझ्नका लागि जिल्ला बोलाइएको बताए ।
प्रधानमन्त्रीबारेको अभिव्यक्तिसँगै डीएसपी चौधरीविरुद्ध अन्य गुनासोसमेत आएकाले ती विषयमा पनि सोधपुछका लागि बोलाइएको जिल्ला प्रहरी कार्यालय कैलालीले जनाएको छ ।
घोडाघोडीको कार्यक्रममा चौधरीले ‘अन्यायमा परेकालाई न्याय दिलाउने पुलिस यही हो, केपी ओलीलाई थुन्ने पुलिस पनि यही हो’ भन्दै प्रहरी संगठनको निष्पक्ष भूमिकाबारे धारणा राखेका थिए ।
उनले आफूहरू राजनीतिक प्रभावबाट नभई प्रतिस्पर्धात्मक प्रक्रियाबाट छनोट भएर प्रहरी सेवामा आएको बताएका थिए ।
भिडियो सार्वजनिक नगर्न उनले कार्यक्रममा आग्रह गरे पनि उक्त भिडियो सामाजिक सञ्जालमा फैलिएको थियो ।
त्यसपछि उत्पन्न भएको चर्चा र विवादका बीच जिल्ला प्रहरीले उनको अभिव्यक्ति कुन सन्दर्भमा आएको हो भन्ने विषयमा सामान्य सोधपुछका लागि बोलाइएको जनाएको छ ।
भर्खरै
लोकप्रिय
