दाङ- घोराही उपमहानगरपालिका–१५ स्थित पद्मोदय माध्यमिक विद्यालयको विद्यालय व्यवस्थापन समिति निर्वाचनलाई लिएर विवाद हुँदा शिक्षा अधिकृतमाथि कालो मोबिल खनाएर दुर्व्यवहार गरिएको छ ।
घोराही उपमहानगरपालिकाका शिक्षा अधिकृत अजय बोहोरामाथि वडा नम्बर १५ का वडा सदस्य लेखनाथ बुढाथोकीले कालो मोबिल खनाएर दुर्व्यवहार गरेकाे घटना सार्वजनिक भएको हाे । घटनापछि प्रहरीले वडा सदस्य बुढाथोकीको खोजी सुरु गरेको जनाएको छ ।
वडा सदस्य बुढाथोकीले विद्यालय व्यवस्थापन समितिको निर्वाचन कानुनविपरीत ढंगले अघि बढाइएको दाबी गरेका छन्। निर्वाचनअघि अभिभावकको गणपूरक संख्या पुगेको भेलाबाट निर्णय हुनुपर्ने र गणपूरक संख्या नपुगेमा तीन पटकसम्म अभिभावक भेला आह्वान गर्नुपर्ने कानुनी व्यवस्था रहेको छ ।
विद्यालयले उक्त प्रक्रिया पूरा नगरी निर्वाचन अघि बढाएको तथा शिक्षा अधिकृत बोहोराले त्यसलाई स्वीकृति दिएको आराेप छ ।
यता, शिक्षा अधिकृतमाथि दुर्व्यवहार भएको घटनालाई लिएर प्रहरीले अनुसन्धान अघि बढाएको छ । दाङका प्रहरी प्रमुख प्रहरी उपरीक्षक दीपक श्रेष्ठका अनुसार घटनापछि वडा सदस्य लेखनाथ बुढाथोकी फरार रहेका छन् र उनको खोजी कार्य जारी छ ।
भर्खरै
लोकप्रिय
