काठमाडौँ – राष्ट्रिय स्वतन्त्र पार्टी (रास्वपा)का प्रमुख सचेतक कविन्द्र बुर्लाकोटीले प्रेस स्वतन्त्रता, अभिव्यक्ति स्वतन्त्रता र पारदर्शी संसदीय अभ्यासप्रति आफ्नो पार्टी प्रतिबद्ध रहेको बताएका छन्।
सोमबार सञ्चारकर्मीहरूसँगको छलफलका क्रममा उनले मुलुक निर्माण र लोकतान्त्रिक मूल्यमान्यताको सुदृढीकरणका लागि सबै पक्षसँग सहकार्य गरेर अगाडि बढ्ने बताएका हुन्।
उनले प्रेस स्वतन्त्रता, सूचनाको हक र पारदर्शी संसदीय अभ्यास लोकतन्त्रका अनिवार्य भएको उल्लेख गर्दै रास्वपाले यी सिद्धान्तहरूलाई व्यवहारमै उतार्न चाहेको बताए।
नेपालको विकास र लोकतान्त्रिक स्तरलाई युरोपेली वा स्क्यान्डिनेभियन मुलुकहरूको तुलनामा पुर्याउने लक्ष्य राखे पनि त्यसका लागि आवश्यक कानुन, पूर्वाधार र सोहीअनुरूपको चिन्तन विकास हुन समय लाग्ने उनको भनाइ थियो।
उनले ती मुलुकहरूको स्तरमा पुग्न केही वर्ष लाग्ने भए पनि त्यसका लागि आवश्यक अभ्यास र प्रयासहरू अहिले नै सुरु गरिसकिएको दाबी गरे।
उनले देश निर्माणको लक्ष्य प्राप्तिका लागि सञ्चार जगतबाट आउने सुझाव र प्रयासहरूलाई सकारात्मक रूपमा लिएर अगाडि बढ्नेसमेत बताए।
भर्खरै
लोकप्रिय
