बाजुरामा एक युवककाे हत्या, एक जना पक्राउ

धनगढी- बाजुरामा एक युवकको हत्या भएको छ । बुढीनन्दा नगरपालिका- ६ कोटिला बस्ने ३२ वर्षीय निर रावतको हत्या भएको प्रहरीले जनाएको छ ।

जिल्ला प्रहरी कार्यालयका प्रहरी निरीक्षक नरेशबहादुर शाहीले आपसी विवादका क्रममा बुधबार राति रावतको हत्या भएको पाइएको बताए ।

उनकाअनुसार हत्यामा संलग्न रहेको आरोपमा १९ वर्षीय टेकेन्द्र रावतलाई पक्राउ गरिएको छ ।

उनलाई इलाका प्रहरी कार्यालय बुढीनन्दाको टोलीले राति नै पक्राउ गरेको हो । घटनाकाे थप अनुसन्धानका लागि जिप्रकाबाट प्रहरी निरीक्षक शाही नेतृत्वको टोली घटनास्थलतर्फ गइरहेको छ ।

प्रारम्भिक अनुसन्धानमा आपसी विवादका क्रममा टेकेन्द्रले निरलाई ढुंगा प्रहार गरेको पाइएको प्रहरीको भनाइ छ ।

घटनाबारे थप अनुुसन्धान भइरहेको प्रहरीले जनाएको छ ।