- नेपाल राष्ट्र बैंकको प्रतिवेदनअनुसार मधेस प्रदेशको कुल सिञ्चित क्षेत्रफल ४.३४ प्रतिशतले घटेर ३ लाख १९ हजार ८० हेक्टर पुगेको छ।
- कृषि बालीहरुको कुल उत्पादन १०.५९ प्रतिशतले घटेर ४२ लाख ५२ हजार १९९ मेट्रिक टनमा सीमित भएको छ।
- यस वर्ष धान, मकै, गहुँलगायतका बालीहरुको उत्पादनमा ठूलो गिरावट आएको छ भने उखु र सुर्ती उत्पादन बढेको छ।
जनकपुरधाम- अन्नको भण्डार रहेको मधेस प्रदेशमा सिञ्चित क्षेत्रफलमा कमी आएको छ ।
नेपाल राष्ट्र बैँकले सार्वजनिक गरेको प्रतिवेदन अनुसार मधेस प्रदेशको कुल सिञ्चित क्षेत्रफलमा ४.३४ प्रतिशतले कमी आएर ३ लाख १९ हजार ८० हेक्टर पुगेको छ । गत वर्ष २.४१ प्रतिशतले सिञ्चित क्षेत्र बढेकोमा यस वर्ष त्यसमा कमी आएको हो ।
बैँकले सार्वजनिक गरेको मधेस प्रदेशको आर्थिक गतिविधि अध्ययन अर्ध–वार्णिक प्रतिवेदन आव २०८२/८३ अनुसार यस वर्ष कुलोद्वारा सिञ्चित क्षेत्र ५.६७ प्रतिशतले कमी भई १ लाख ७ हजार २३४ हेक्टर, नहरद्वारा सिञ्चित क्षेत्रफल ०.९७ प्रतिशतले कमी भई १ लाख ६५ हजार १२४ हेक्टर र बोरिङद्वारा सिञ्चित क्षेत्रफल ९ प्रतिशतले कमी भई ४१ हजार ५८६ हेक्टर पुगेको हो ।
मधेसमा सिञ्चित क्षेत्रफल घट्दा कृषि उत्पादनमा समेत कमी आएको हो । राष्ट्र बैँकका अनुसार प्रदेशको समग्र कृषि बालीहरुको कुल उत्पादनमा १०.५९ प्रतिशतले कमी भई ४२ लाख ५२ हजार १९९ मेट्रिक टन उत्पादनमा सिमित भएको हो । गत आवको यहि अवधिमा कुल उत्पादनमा १.१७ प्रतिशतले वृद्धि भएको थियो ।
चालु आवको पुस मसान्तसम्मको तथ्यांक अनुसार मधेस प्रदेशमा धान उत्पादन १३.४८ प्रतिशतले घटेको छ । यस्तै, मकै उत्पादन ३४.०९, गहुँ उत्पादन २२.४४, कोदो उत्पादन ६९.०५, जौँ उत्पादन ३.५६, आलु उत्पादन ५७.९७ प्रतिशत, सनपाट उत्पादन ७५.९४ र दलहन उत्पादन २०.८६ प्रतिशतले घटेको हो ।
गत आवको यस अवधिमा भने धान, मकै, गहुँ र तेलहन उत्पादनमा वृद्धि भएको थियो । यस वर्ष उखु , सुर्ती र तेलहन उत्पादनमा वृद्धि भएको हो । उखु ०.७७ प्रतिशतले, सुर्ती १५.६३ प्रतिशतले र तेलहन उत्पादन ७.१९ प्रतिशतले वृद्धि भएको हो ।
गत वर्ष उखु उत्पादन १६.८२ प्रतिशतले र दलहन उत्पादन ४१.३९ प्रतिशतले घटेको थियो ।
भर्खरै
लोकप्रिय
