क्यालिफोर्नियामा अमेरिकी वायुसेनाको बी–५२ बमवर्षक दुर्घटना हुँदा आठ जनाको मृत्यु

अमेरिकाको क्यालिफोर्निया स्थित एडवार्ड्स एयर फोर्स बेसमा अमेरिकी वायुसेनाको बी-५२ बमवर्षक विमान दुर्घटनाग्रस्त हुँदा आठ जनाको मृत्यु भएको छ। मृतकमध्ये दुई जना बोइङका कर्मचारीसमेत रहेका छन्।

सोमबार स्थानीय समयअनुसार बिहान ११:२० बजे नियमित परीक्षण उडानका क्रममा विमानले उडान भरेलगत्तै दुर्घटना भएको थियो। दुर्घटनापछि आकाशमा बाक्लो कालो धुवाँको मुस्लो उठेको थियो। आधार शिविरका कमान्डर कर्नेल जेम्स हेयसले घटनालाई  ‘भयानक दुर्घटना’ भन्दै यसमा सैन्य, सरकारी कर्मचारी र सरकारी ठेकेदारहरू सम्मिलित आठ उत्कृष्ट अमेरिकी नागरिकले ज्यान गुमाएको बताए।

प्रारम्भिक अनुसन्धानले दुर्घटनामा कोही पनि जीवित बच्ने सम्भावना नरहेको देखाएको थियो। मृतकका परिवारलाई जानकारी दिने प्रक्रिया जारी रहेकाले उनीहरूको नाम तत्काल सार्वजनिक गरिएको छैन। अधिकारीहरूका अनुसार दुर्घटना रनवेमै भएको थियो र विमान उड्नेबित्तिकै आगो लागेको थियो। त्यसपछि आधार शिविरका सम्पूर्ण उडान गतिविधि अस्थायी रूपमा रोकिएका छन्।

दुर्घटनाग्रस्त विमान बी-५२ स्ट्राटोफोर्ट्रेस थियो, जुन आधार शिविरको रडार आधुनिकीकरण कार्यक्रममा संलग्न रहेको बताइएको छ। दुर्घटनाको कारण अझै खुल्न सकेको छैन। प्रारम्भिक अनुसन्धान पूरा हुन करिब ३० दिन लाग्न सक्ने र विस्तृत प्राविधिक विश्लेषण गर्न ६  महिनाभन्दा बढी समय लाग्न सक्ने अधिकारीहरूले बताएका छन्।

अलग वक्तव्य जारी गर्दै बोइङले आफ्ना दुई कर्मचारी विमानमा रहेको पुष्टि गरेको छ र उनीहरूका परिवारसँग सम्पर्कमा रहेको जनाएको छ।क्यालिफोर्नियाका गभर्नर ग्याभिन न्युसम ले सामाजिक सञ्जाल एक्समार्फत घटनालाई दुःखद दुर्घटना भन्दै मृतकका परिवारप्रति समवेदना व्यक्त गरेका छन्।

सन् १९५० को दशकदेखि अमेरिकी सेनाले प्रयोग गर्दै आएको बोइङ बी-५२ लाई विश्वकै सबैभन्दा चर्चित रणनीतिक बमवर्षक विमानमध्ये एक मानिन्छ। ‘बफ’ उपनामले चिनिने यो विमानले परम्परागत बमदेखि आणविक क्रुज मिसाइलसम्म बोक्न सक्छ। यसको अधिकतम उडान उचाइ ५० हजार फिटसम्म पुग्छ र हावामै इन्धन भर्न सक्ने भएकाले यसको आक्रमण दायरा अत्यन्त लामो मानिन्छ।