मोरङ- मोरङस्थित सशस्त्र प्रहरी बल नेपाल नम्बर तीन गण हेडक्वाटर कंकालिनीले भन्सार नतिरी अवैध रूपमा भारतबाट नेपाल भित्र्याइएका ७ लाख रुपैयाँभन्दा बढी मूल्यका विभिन्न सामग्रीहरू बरामद गरेको छ।
कंकालिनी तथा सशस्त्र प्रहरी बल मोरङका प्रमुख, सशस्त्र प्रहरी उपरीक्षक गेहेन्द्रबहादुर भण्डारीका अनुसार सोमबार भन्सार कागजात बिना नै भारतबाट छली गरी नेपाल भित्र्याइएका लत्ताकपडा, खाद्यान्न तथा मल्टिभिटामिन गरी कुल ७ लाख ८२ हजार ८० रुपैयाँ बराबरको अवैध सामग्री बरामद गरिएको हो।
सीमावर्ती क्षेत्रमा विभिन्न सवारी साधनहरूमा चेकजाँच गर्ने क्रममा उक्त परिमाणका सामानहरू फेला परेका हुन्। बरामद गरिएका सामग्रीहरूमा ४ लाख ५५ हजार रुपैयाँभन्दा बढी मूल्यको लत्ताकपडा, २ लाख ७५ हजार ४ सय रुपैयाँ बराबरको मल्टिभिटामिन र ५१ हजार रुपैयाँभन्दा बढी मूल्यका किराना सरसामानहरू रहेका छन्।
सशस्त्र प्रहरी उपरीक्षक भण्डारीले बरामद गरिएका ती सम्पूर्ण सामग्रीहरूलाई आवश्यक कारबाहीका लागि मोरङको विराटनगर भन्सार कार्यालयमा बुझाइसकिएको जानकारी दिए।
भर्खरै
लोकप्रिय
