काठमाडौँ – नेपाली कांग्रेसका नेता बद्रीप्रसाद पाण्डेले पूर्वप्रधानमन्त्री र पूर्वगृहमन्त्रीको गिरफ्तारीमा राज्यले विधि र प्रक्रिया मिचेको आरोप लगाएका छन्।
मंगलबार पूर्णबहादुर खड्का र शेखर कोइराला पक्षको केन्द्रीय समिति बैठकका क्रममा सञ्चारकर्मीहरुसँग कुरा गर्दै उनले यस विषयमा पार्टीले गम्भीर राजनीतिक समीक्षा गर्ने बताएका हुन्।
राजनीतिक वृत्तका साथै कानूनी र मानवअधिकारवादी क्षेत्रबाट समेत यसमाथि प्रश्न उठेको उल्लेख गर्दै उनले पछिल्ला घटनाक्रमबारे अनौपचारिक भेलामार्फत छलफल र परामर्श अघि बढाइने जानकारी दिए।
गत शनिबार जेन–जी आन्दोलन दबाएको आरोपमा प्रहरीले नेकपा एमाले अध्यक्ष केपी शर्मा ओली र कांग्रेसका नेता रमेश लेखकलाई ज्यानसम्बन्धी कसुरमा पक्राउ गरेको थियो।
उनले पार्टीभित्रको आन्तरिक एकता र राष्ट्रिय राजनीतिका समसामयिक विषयमा छलफल गर्न कांग्रेस नेताहरूको अनौपचारिक भेला आयोजना गरिएको बताए। पाण्डेले यस्ता अनौपचारिक छलफलहरूले नागरिक तहमा विश्वास जगाउने र देश निर्माणको बाटोमा सबैलाई गोलबन्द गर्न सहयोग पुग्ने विश्वास व्यक्त गरे।
भर्खरै
लोकप्रिय
