काठमाडौँ – संसद्को चौथो ठूलो दल नेकपाले उपसभामुख पदमा आकांक्षा देखाएको छ। शुक्रबार सभामुख चयन प्रक्रिया अगाडि बढेसँगै नेकपाले उपसभामुख पद प्राप्त गर्न लालच देखाएको हो।
उपसभामुख संवैधानिक परिषद्को सदस्यसमेत हुने भएकाले ठूला नियुक्तिहरूमा आफ्नो उपस्थिति देखाउन र रास्वपासँग सुमधुर सम्बन्ध राख्न नेकपाले उपसभामुख पदमा दाबी गरेको हो।
शुक्रबार सभामुखमा डोलप्रसाद अर्यालको एकल उम्मेदवारी परेको छ। प्रतिनिधि सभामा सभामुख एउटा दलको भएपछि उपसभामुख फरक दल र लिङ्गबाट हुनुपर्ने संवैधानिक व्यवस्था छ। जसका कारण नेकपाले उपसभामुख पद आफूलाई दिनुपर्ने लविङ सुरु गरेको हो।
नेकपाका सचेतक युवराज दुलालले उपसभामुख पद आफ्नो पार्टीलाई दिनका लागि आग्रह गरिएको जानकारी दिए। तर, रास्वपाका सभापति रवि लामिछानेले भने उपसभामुख पदबारे अहिलेसम्म छलफल नै नभएको बताए।
सिंहदरबारमा पत्रकारहरुसँग कुरा गर्दै लामिछानेले कुन दललाई उपसभामुख दिने भन्नेबारे सभामुख चयनको प्रक्रियाले पूर्णता पाएपछि मात्रै छलफल हुने जनाए।
रास्वपानिकट स्रोतका अनुसार उपसभामुख नेकपा वा राप्रपालाई दिने विषयमा छलफल भइरहेको छ। प्रतिनिधि सभामा दुई तिहाइ सन्निकट रहेको रास्वपाले सहज हुने दलसँग सहकार्य गर्ने नीति लिएको छ।
संवैधानिक व्यवस्थाअनुसार संसद्को पहिलो अधिवेशन सुरु भएको १५ दिनभित्र सभामुख र उपसभामुख चयन गरिसक्नुपर्छ।
भर्खरै
लोकप्रिय
