इरान–अमेरिका तनाव चुलियो, ट्रम्पको ४८ घण्टे अल्टिमेटम

अमेरिकी राष्ट्रपति डोनाल्ड ट्रम्पले इरानलाई महत्वपूर्ण जलमार्ग हर्मुज जलडमरु क्षेत्र खुला गर्न ४८ घण्टाको समयसीमा दिएका छन्। उक्त चेतावनीप्रति इरानले कडा प्रतिक्रिया जनाउँदै यसलाई ‘असन्तुलित र मूर्खतापूर्ण’ भनेको छ।

यसबीच इरानको दुर्गम क्षेत्रमा हराइरहेको अमेरिकी सैनिक पाइलटको खोजी कार्य शनिबार पनि जारी रहेको जनाइएको छ। हाल छ हप्तादेखि जारी युद्धका क्रममा शुक्रबार दुई अमेरिकी युद्ध विमान खसालिएपछि तनाव थप बढेको छ।

अमेरिकी राष्ट्रपति ट्रम्पले इरानलाई युद्धमा ‘पूर्ण रूपमा पराजित’ भएको बताएका छन् । तर इरानले भने आफ्नो भूमिमा शत्रु पाइलट फेला पार्ने प्रयास भइरहेको जनाएको छ।

इरानको संयुक्त सैन्य कमान्डका जनरल अली अब्दोल्लाही अलियाबादीले चेतावनी दिँदै भने, “यदि हाम्रो पूर्वाधारमा आक्रमण भयो भने नर्कका ढोका खुल्नेछन्।” उहाँले क्षेत्रभित्र रहेका अमेरिकी सैन्य पूर्वाधारलाई पनि निशाना बनाउन सकिने बताए।

यो युद्ध फेब्रुअरी २८ मा अमेरिका र इजरायलले संयुक्त रूपमा गरेको आक्रमणपछि सुरु भएको हो। युद्धका कारण हजारौँ मानिसको मृत्यु भइसकेको छ भने विश्व बजारमा अस्थिरता आएको, प्रमुख जलमार्ग अवरुद्ध भएको र इन्धनको मूल्य वृद्धि भएको बताइएको छ।

दुवै पक्षले नागरिक क्षेत्रमा समेत आक्रमण गरेको आरोप लागेको छ, जसले युद्ध अपराधको सम्भावनाबारे चिन्ता बढाएको छ।
इजरायलका प्रधानमन्त्री बेन्जामिन नेतन्याहुले इरानको महशहरस्थित पेट्रोकेमिकल केन्द्रमा आक्रमण गरिएको पुष्टि गरेका छन्। उक्त आक्रमणमा पाँच जनाको मृत्यु र १७० जना घाइते भएको इरानी सञ्चारमाध्यमले जनाएको छ।

यसैबीच इरानको आणविक ऊर्जा सङ्गठनले बुशेहर आणविक केन्द्र नजिकै पनि आक्रमण भएको जनाएको छ, जसमा एक सुरक्षाकर्मीको मृत्यु भएको छ र एक सहायक भवनमा क्षति पुगेको छ। उक्त क्षेत्रमा कार्यरत कामदारहरूलाई सुरक्षित स्थानमा सारिएको बताइएको छ।

हालको अवस्थाले युद्ध अझ चर्किन सक्ने संकेत देखिएको छ भने कूटनीतिक वार्ताको सम्भावना कमजोर बन्दै गएको विश्लेषण गरिएको छ।