बाँकेकाे नाैबस्ता कारागारमा लफडा

नेपालगन्ज – बाँकेकाे नाैबस्ता कारागारमा लफडा भएकाे छ। दुई समूहबीच एक-अर्कालाई निषेध गर्ने गरी विवाद भएपछि गएरातिदेखि नै कारागारमा लफडा भएकाे थियाे।

नाइकेकाे व्यवहारलाई लिएर विवाद भएकाे बताइएकाे छ। केही कैदीबन्दीलाई बी ब्लकबाट डीमा सारेपछि विवाद सुरु भएकाे थियाे। कारागारमा नाइके शक्तिशाली हुन्छन्। भित्र उसकाे खटन-पटन हुन्छ।

नाइकेले आफ्नाे मान्छेलाई च्याप्ने र मन नपरेकाेलाई दमन गर्ने गर्दछन्। अहिले पनि दमन गरेकाे अर्काे पक्षकाे आराेप रहेकाे छ। नाइकेकाे छनाैट साउनमा हुन्छ। एउटा समूहले आफ्नाे मान्छेलाई नाइके बनाउन लफडा सुरु गरेकाे अर्काे पक्षकाे भनाइ छ।

विवाद बढेपछि दुई समूहका कैदी-बन्दी ढाेका थुनेर बसेका छन्। भित्र ठूलाे झडप हुन नदिन बिहानदेखि नै ठूलाे संख्या प्रहरी परिचालन गरिएकाे थियाे। बाँकेका सहायक प्रमुख जिल्ला अधिकारी, दुई एसपी दिनभरी नाैबस्तामा खटिएका छन्।

सहायक प्रमुख जिल्ला अधिकारी पूर्णबहादुर खत्रीले ताला फाेडेर विवाद गर्नेलाई बाहिर निकालेकाे बताए। उनले एक दर्जनलाई अन्यत्र सरुवा गर्ने तयारी भइरहेकाे जानकारी दिए। त्यसका लागि विभागबाट अनुमति लिइसकिएकाे छ। ताला फाेडेर प्रहरी भित्र जादा प्रतिकार नभएपछि झडप नभएकाे खत्रीले बताए।