काठमाडौँ — नेपाली कांग्रेसका सभापति गगन थापाले राष्ट्रिय स्वतन्त्र पार्टी (रास्वपा)को प्रथम ऐतिहासिक राष्ट्रिय महाधिवेशनको अवसरमा रास्वपा सभापति रवि लामिछाने तथा सम्पूर्ण रास्वपा परिवारलाई शुभकामना व्यक्त गरेका छन्।
सामाजिक सञ्जालमा एक सन्देश जारी गर्दै काँग्रेस सभापति थापाले रास्वपाले छोटो समयमै नेपाली राजनीतिमा हासिल गरेको उपलब्धिलाई प्रशंसा गरेका हुन्।
थापाले रास्वपा स्थापनाको छोटो अवधिमै उल्लेखनीय जनसमर्थन प्राप्त गरी राष्ट्रिय राजनीतिमा आफूलाई बलियो रूपमा स्थापित गर्न सफल भएको उल्लेख गरेका छन्।
सभापति रवि लामिछानेको नेतृत्वमा संगठन निर्माणदेखि निर्वाचनसम्मको यात्रा प्रशंसनीय रहेको भन्दै उनले यो महाधिवेशन रास्वपाका लागि विचार, संगठन र नीतिका दृष्टिले अझ परिपक्व, जिम्मेवार र दूरदर्शी दृष्टिकोण निर्माण गर्ने ऐतिहासिक अवसर भएको बताएका छन्।
यसैगरी, थापाले यो महाधिवेशनले लोकतान्त्रिक मूल्य र अभ्यासहरूलाई आत्मसात् गर्न तथा संविधानप्रदत्त नागरिक अधिकारको संरक्षण गर्न पार्टीलाई वैचारिक रूपमा स्पष्ट, जवाफदेही र थप उत्तरदायी गराउन गति र ऊर्जा प्रदान गर्ने अपेक्षा राखेका छन्।
उनले रास्वपाको प्रथम महाधिवेशनको पूर्ण सफलताको कामना गर्दै सभापति लामिछानेको आगामी राजनीतिक यात्राका लागि समेत शुभकामना दिएका छन्।
भर्खरै
लोकप्रिय
