काठमाडौँ- फेवाताल किनारको जग्गा प्रकरणमा गृहमन्त्री सुधन गुरूङले आफू ठगिएको दाबी गर्दै कानुनी प्रक्रियामा जाने बताएका छन्।
पोखरा महानगरका मेयर धनराज आचार्यले फेवातालको मापदण्डभित्र पर्ने क्षेत्रमा गुरूङको २० रोपनी जग्गा रहेको विषय सार्वजनिक गरेपछि विवाद चर्किएको हो।
यता, गृहमन्त्री गुरूङले भने उक्त जग्गा आफ्नो नभई व्यवसायका लागि भाडामा लिएको स्पष्ट पारेका छन्। जग्गाधनीले उक्त जग्गा तालको ६५ मिटर मापदण्डभित्र पर्छ भन्ने तथ्य लुकाएर झुक्याएको उनको भनाइ छ। यो कुरा पछि मात्र थाहा पाएपछि आफूले तत्कालै निर्माण र लगानी रोकेको उनले जनाएका छन्।
उनका अनुसार, करिब ८-१० वर्षअघि आफू सहित तीन युवा उद्यमीले ‘एड्भेन्चर स्पोर्ट्स नेपाल’ सञ्चालन गर्ने उद्देश्यले सो जग्गा भाडामा लिएका थिए। त्यतिबेला जग्गाधनीले मापदण्डबाहिर रहेको भन्दै विश्वास दिलाएका थिए, तर पछि नगरपालिकाबाट बुझ्दा मापदण्डभित्र पर्ने देखिएको हो।
गुरूङले आफूहरूमाथि अन्याय भएको भन्दै दोषीमाथि कडा कानुनी कारबाहीका लागि अगाडि बढ्ने बताएका छन्।
यो पनि पढ्नुहोस्
भर्खरै
लोकप्रिय
