काठमाडौँ – श्रम संस्कृति पार्टीका अध्यक्ष एवं सांसद हर्क साम्पाङले दार्चुलाको विकट अवस्थाबारे सरकारको ध्यानाकर्षण गराएका छन्।
शुक्रबार प्रतिनिधिसभा बैठकमा बोल्दै उनले दार्चुलाको अवस्था देखेर आफू रोएर आएको बताए। ब्यास गाउँपालिकाको दुम्लिङसम्म पुग्दा बाटो नभएर मान्छे महाकालीमा तुइनबाट खसेर मर्ने अवस्था रहेको उनको भनाइ छ।
तुइनबाट नझरेको कुनै घर परिवार नै नरहेको उनले बताए। उनले भौतिक पूर्वाधार तथा शहरी विकासमन्त्री र गृहमन्त्रीलाई दार्चुलाको ब्यास क्षेत्रमा स्थलगत भ्रमण गर्न र त्यहाँका जनताको पीडा बुझ्न आग्रह गरे।
यस्तै, उनले संसद्भित्र प्रयोग हुने शब्द र व्यवहारमा सुधार गर्नुपर्नेमा जोड दिए। केही सांसदहरूले उपसभामुख उम्मेदवार रुवीकुमारी ठाकुरलाई ‘बहिनी’ भनेर सम्बोधन गरेकोमा उनले आपत्ति जनाए।
त्यस्तै, ज्येष्ठ नागरिकका विषयमा अपमानजनक शब्द प्रयोग नगर्न आग्रह गर्दै उनले प्रकृतिको नियमअनुसार सबै बुढो हुने भएकाले उमेरलाई लिएर उपहास नगर्न सचेत गराए।
पर्यटन तथा नागरिक उड्डयन मन्त्रालयको ध्यानाकर्षण गराउँदै उनले बिना कारण उडान (फ्लाइट) ढिलो गर्ने विमान कम्पनीहरूलाई जरिवाना गर्नुपर्ने माग राखे।
संसदमा समर्थन जनाउँदा टेबल र कुर्सी ठोक्ने परम्परालाई ‘अमर्यादित’ भन्दै उनले त्यसको साटो दुई हातले ताली बजाउने संस्कृति सुरु गर्न प्रस्ताव गरे।
भर्खरै
लोकप्रिय
