त्रिवेणी (रुकुम पश्चिम) – रुकुम पश्चिमबाट एक जना सुत्केरीको हेलिकप्टरमार्फत उद्धार गरिएको छ। जिल्लाको मुसिकोट नगरपालिका-१४ की सुशीला रोकालाई थप उपचारका लागि सेनाको हेलिकप्टरमार्फत उद्धार गरी सुर्खेत पठाइएको हो।
रोकाले बिहीबार जिल्ला अस्पताल सल्लेमा जुम्ल्याहा शिशुलाई जन्म दिएकी हुन्। सुत्केरी आमा तथा जुम्ल्याहा नवजात शिशुको स्वास्थ्य अवस्थामा जटिलता देखिएपछि थप उपचारका लागि सुविधा सम्पन्न अस्पतालमा पठाइएको जिल्ला स्वास्थ्य कार्यालयले जनाएको छ।
चिकित्सकको सिफारिसअनुसार रोकालाई प्रादेशिक अस्पताल, वीरेन्द्रनगर सुर्खेत पठाइएको प्रमुख जिल्ला अधिकारी निशानराज गौतमले जानकारी दिए।
उनका अनुसार जिल्ला स्वास्थ्य कार्यालयको समन्वय तथा राष्ट्रपति महिला उत्थान कार्यक्रमअन्तर्गत सल्ले विमानस्थलबाट हेलिकप्टरमार्फत सुत्केरी आमा र जुम्ल्याहा शिशुलाई सुर्खेत लगिएको छ। समयमा हवाई उद्धारको व्यवस्था भएपछि आमा र शिशुको थप उपचार सहज भएको परिवारले जनाएको छ।
भर्खरै
लोकप्रिय
