पौडेललाई थुनामुक्त गर्न माग गर्दै बन्दी प्रत्यक्षीकरण रिट

काठमाडौं-  पूर्वउपप्रधानमन्त्री तथा नेकपा एमालेका उपाध्यक्ष विष्णु पौडेललाई गैरकानुनी ढंगले थुनामा राखिएको दाबीसहित सर्वोच्च अदालतमा बन्दीप्रत्यक्षीकरणको रिट दायर भएको छ।

पौडेलकी पत्नीले दायर गरेकाे रिटमा राजनीतिक प्रतिशोध राखेर पक्राउ गरिएको दाबीसहित थुनामुक्त गर्न माग गरिएको छ।

बिनाप्रमाण पक्राउ गरिएको भन्दै बन्दीप्रत्यक्षीकरण आदेश जारी गर्न माग गरिएको छ।

पौडेलमाथि सम्पत्ति शुद्धीकरणको आरोप लगाउँदै अनुसन्धानका लागि प्रहरी हिरासतमा राखिएको छ।

उनलाई विशेष अदालतबाट मंगलबार सात दिनको थुना म्याद थप भएको थियो। उक्त रिटमा बिहीबार सुनुवाइको पेसी तय भएको छ।

पौडेललाई सोमबार सुर्खेतमा पक्राउ गरेर कोहलपुर हुँदै सार्वजनिक सवारीमा राखेर रातारात काठमाडौँ ल्याइएको हो।