प्रविधिमैत्री शिक्षा आजको आवश्यकता : मन्त्री तिमिल्सिना

दाङ – लुम्बिनी प्रदेशका सामाजिक विकास मन्त्री तथा लुम्बिनी प्राविधिक विश्वविद्यालयका सहकुलपति माननीय जन्मजय तिमिल्सिनाले शिक्षा प्रणालीलाई प्रविधिमैत्री र व्यवहारिक सीपमा आधारित बनाउनुपर्नेमा जोड दिएका छन्।

लुम्बिनी प्राविधिक विश्वविद्यालयको चौथो वार्षिकोत्सव समारोहलाई सम्बोधन गर्दै मन्त्री तिमिल्सिनाले समयअनुसार शिक्षा प्रणालीलाई आधुनिकीकरण गर्दै प्रविधिसँग गहिरो रूपमा जोड्नुपर्ने आवश्यकता रहेको बताए। उनले प्राविधिक शिक्षा नै आत्मनिर्भर अर्थतन्त्र र रोजगारी सिर्जनाको प्रमुख आधार भएको उल्लेख गरे।

मन्त्री तिमिल्सिनाले विश्वविद्यालय लुम्बिनी प्रदेशका मात्र नभई कर्णाली र सुदूरपश्चिम प्रदेशका विद्यार्थीका लागि समेत महत्वपूर्ण शैक्षिक केन्द्रका रूपमा विकास हुँदै गएको बताए।

उनका अनुसार गुणस्तरीय प्राविधिक शिक्षा र व्यवहारिक सीप विकासमार्फत युवालाई स्वदेशमै अवसर सिर्जना गर्ने लक्ष्यमा विश्वविद्यालयले उल्लेखनीय योगदान दिइरहेको छ।

उनले प्रविधिको सही प्रयोगले विद्यार्थीको ज्ञान, सीप र क्षमता वृद्धि भई देशभित्रै रोजगारीका अवसर विस्तार गर्न सहयोग पुग्ने विश्वास व्यक्त गरे। साथै प्राविधिक अध्ययनका लागि विदेश जानुपर्ने बाध्यता क्रमशः घट्दै गएको उल्लेख गर्दै लुम्बिनी प्राविधिक विश्वविद्यालय प्राविधिक शिक्षाको उत्कृष्ट गन्तव्यका रूपमा स्थापित हुँदै गएको धारणा राखे।

कार्यक्रममा लुम्बिनी प्रदेश सभाका माननीयहरू, शिक्षाविद्, प्राध्यापक तथा विद्यार्थीहरूको उपस्थिति रहेको थियो। सहभागीहरूले आधुनिक प्रविधिसँग जोडिएको शिक्षाले राष्ट्रिय विकासमा महत्वपूर्ण योगदान पुर्‍याउने विश्वास व्यक्त गरेका थिए।

विश्वविद्यालयले सूचना प्रविधि, इन्जिनियरिङ तथा अन्य प्राविधिक विषयमा गुणस्तरीय शिक्षा प्रदान गर्दै आएको छ।