- हुम्लाको ताँजाकोट गाउँपालिकामा ११ शिशु र १० आमाहरू गम्भीर कुपोषण उपचारका लागि जुम्ला पठाइएका छन्।
- गाउँपालिकाका पोषण पुनःस्थापना केन्द्रको अभावले गर्दा बिरामीहरूलाई कर्णाली स्वास्थ्य विज्ञान प्रतिष्ठान, जुम्ला पठाउनु परेको हो।
- स्वास्थ्य शाखाले अझै ६ जना कुपोषित शिशुहरूलाई पनि जुम्ला पठाउने तयारी गरिरहेको जानकारी दिएको छ।
हुम्ला- हुम्लाको ताँजाकोट गाउँपालिकामा गरिएको पोषण लेखाजोखाका क्रममा ‘अति शीघ्र कुपोषण’ देखिएका ११ जना शिशु र १० जना आमाहरूलाई थप उपचारका लागि कर्णाली स्वास्थ्य विज्ञान प्रतिष्ठान, जुम्ला पठाइएको छ ।
गाउँपालिकाको वडा नम्बर १ देखि ५ सम्मका सबै टोल बस्तीहरूमा स्वास्थ्यकर्मी र महिला स्वास्थ्य स्वयंसेविका पुगेर पाँच वर्षमुनिका बालबालिकाहरूको पोषण अवस्था जाँच गर्दा ती शिशुहरूमा गम्भीर कुपोषणको समस्या फेला परेको हो ।
गाउँपालिकाको स्वास्थ्य शाखाका खोप, पोषण तथा भिटामिन ‘ए’ कार्यक्रमका सम्पर्क व्यक्ति धनराज ढकालका अनुसार, पहिलो चरणमा बढी जोखिममा रहेका ११ जना बालबालिका र १० जना आमाहरूलाई मंगलबार जुम्ला पठाइएको हो ।
जुम्ला पठाइएका आमाहरूमा ताँजाकोट–१ का पबित्रा कार्की, सुन्तली रिठाल र जुना कार्की, वडा नम्बर २ का मौसमी चदरा र बसन्ती कटुवाल, वडा नम्बर ३ का मिठा नेपाली, प्रेमक्ला नेपाली र बाँचू नेपाली, वडा नम्बर ४ की कबिता नेपाली र वडा नम्बर ५ की ललिता रोकाया रहेका छन् । जुम्ला पठाइएका शिशुहरूमध्ये मौसमी चदराका दुई जुम्ल्याहा शिशु समेत रहेका छन् ।
ताँजाकोट गाउँपालिकाका स्वास्थ्य संस्था र जिल्ला अस्पतालमा ‘पोषण पुनःस्थापना केन्द्र’ नभएका कारण बिरामीहरूलाई जुम्ला पठाउनु परेको हो । कर्णाली स्वास्थ्य विज्ञान प्रतिष्ठानसँगको समन्वयपछि प्रतिष्ठानले तत्काल पठाउन आग्रह गरेबमोजिम उनीहरूलाई लिन जुम्लाबाटै गाडी आएको थियो ।
अब ती शिशुहरूको प्रतिष्ठानको पोषण पुनःस्थापना केन्द्रमा निःशुल्क उपचार र स्याहार हुनेछ । गाउँपालिकामा अझै ६ जना कुपोषित शिशुहरू रहेको र उनीहरूलाई पनि उपचारका लागि जुम्ला पठाउने तयारी भइरहेको स्वास्थ्य शाखाले जनाएको छ ।
भर्खरै
लोकप्रिय
