म राजनीति होइन, समृद्धिको ढोका खोल्न दिल्ली आएँः रवि

काठमाडौँ – राष्ट्रिय स्वतन्त्र पार्टीका सभापति रवि लामिछानेले आफू नेपालमा समृद्धिको ढोका खोल्न नयाँ दिल्ली आएको बताएका छन्।

प्रवासी नेपाली सम्पर्क मञ्च भारतले बिहीबार आयोजना गरेको कार्यक्रमलाई सम्बोधन गर्दै उनले आफू राजनीतिको ढोका खोल्न नभई समृद्धिको ढोका खोल्न आएको बताएका हुन्।

उनले भने,’नयाँ दिल्लीमा राजनीतिको ढोका खोल्न त धेरै मानिसहरू आए। म एसपटक समृद्धिको ढोका खोल्न नयाँ दिल्ली आएको हुँ।’

युगौँदेखि देखिरहेको समृद्ध नेपालको सपना पूरा गर्ने एजेण्डा बोकेर आफू आएको उनको भनाइ छ। उनले भने,’समृद्ध नेपालको एउटा सपना, जुन हामीले सिंगो युगदेखि देखिरहेका थियौँ, त्यसमा सहकार्य गर्ने एजेन्डा बोकेर म यहाँ आएको हुँ।’

आफ्नो व्यक्तिगत माग र मुद्दा नेपाल र नेपालीको उन्नतीमा केन्द्रित रहेको उनले बताए।

उनले भने,’मेरा व्यक्तिगत माग मुद्दा केही पनि छैनन्। पार्टीका माग मुद्दा केही पनि छैनन्। मेरो मुद्दा नेपाल र नेपालीको उन्नतीमा मात्र केन्द्रित छ। त्यत्तिका लागि मात्र म दिल्ली आएको हुँ।’