जनकपुरधाम- मधेस सरकारले आफूहरूका माग सम्बोधन नगरेको भन्दै मधेस आन्दोलनका शहीद परिवारहरुले मधेस भवन अगाडि प्रदर्शन गरेका छन् ।
मंगलबार उनीहरूले मधेस शहीद प्रतिष्ठानलाई स्वायत्त बनाउनुपर्ने, शहीद परिवारहरुलाई शिक्षा, स्वास्थ्य र रोजगारीको ग्यारेन्टी हुनुपर्नेलगायतका माग राख्दै मधेस भवनको द्वार अगाडि प्रदर्शन गरेका हुन् ।
मधेस प्रदेश सरकारको प्रशासनिक भवनलाई मधेस भवन नामकरण गरिएको छ ।
मधेस आन्दोलनको क्रममा ६३ जना शहादत प्राप्त गरेका थिए । संघीयता आएपछि लालबाबु राउत नेतृत्वमा बनेको सरकारले ५२ जना शहिद परिवारलाई रोजगारीको लागि नियुक्तिपत्र दिएकोमा २५ जनालाई मात्रै रोजगारी दिइएको थियो । जसमध्ये अहिले १० जना मात्रै कार्यरत छन् । शहीद परिवार अहिले प्रदेश सरकारको विभिन्न सरकारी कार्यालयमा कार्यालय सहयोगीको रुपमा कार्यरत छन् ।
मधेस सरकारले शहीद परिवारका लागि उपलब्ध गराउने भनिएका सेवा सुविधाबाट आफूहरूलाई वञ्चित गरिएको भन्दै उनीहरूले अनिश्चितकालीन आन्दोलनको घोषणा गरेका छन् ।
पहिलो चरणमा मधेस भवन अगाडि प्रदर्शन गरेका उनीहरूले माग पूरा नभए अझ सशक्त आन्दोलनमा जाने चेतावनी दिएका छन् ।
भर्खरै
लोकप्रिय
