राङ्सीस्थित अस्थायी टहरामा पहिरो पस्दा एक जनाको मृत्यु, दुई घाइते

हुम्ला- जाजरकोटको भेरी नगरपालिका- २ को राङ्सीस्थित अस्थायी टहरामा पहिरो पसेपछि एक वृद्धाको मृत्यु भएको छ ।

जिल्ला प्रहरी कार्यालय जाजरकोटका सूचना अधिकारी प्रहरी निरीक्षक सुधीरकुमार खड्काका अनुसार गए राति करिब ७ बजे माथिबाट खसेको पहिरोले टहरा पुरिँदा ७१ वर्षीया वृद्धा जसीकुमारी शाहीको मृत्यु भएको हो ।

घटनामा कुशे गाउँपालिका–५, दमदालाकी ३५ वर्षीया सीता शाह थापा र उनकी सात वर्षीया छोरी मेनुका थापा घाइते भएकी छन् । स्थानीयले घाइते आमा–छोरीको उद्धार गरेका थिए । हाल उनीहरूको अवस्था सामान्य रहेको छ ।

उद्धार गरिएका सीता र मेनुका मृतक शाहीकी छोरी र नातिनी रहेका छन् । जाजरकोट भूकम्पपछि घर भत्किएपछि उनीहरू सरकारले निर्माण गरिदिएको अस्थायी टहरामा बस्दै आएका थिए।

घटनाको जानकारी पाएलगत्तै प्रहरी चौकी पाँचकाटियाबाट प्रहरी टोली घटनास्थल पुगेको जिल्ला प्रहरी कार्यालय जाजरकोटले जनाएको छ।