- मुस्ताङको घरपझोङ गाउँपालिकामा ठिनी खोलामा पक्की मोटरेबल पुल निर्माण सम्पन्न भएको छ, जुन समयअगावै तयार भएको हो।
- पुल तयार भएपछि मुस्ताङ सदरमुकामका विभिन्न वडाहरू जोड्ने चक्रपथ पूर्ण रूपमा सञ्चालनमा आएको छ।
- पुल निर्माणले मुक्तिनाथ दर्शन गर्न आउने पर्यटक र स्थानीय किसानहरूलाई आवतजावतमा सहजता हुने अपेक्षा गरिएको छ।
मुस्ताङ- मुस्ताङको घरपझोङ गाउँपालिका–५ स्थित ठिनी खोलामा पक्की मोटरेबल पुलको निर्माण कार्य सम्पन्न भएको छ ।
गण्डकी प्रदेश सरकारअन्तर्गतको पूर्वाधार विकास कार्यालय मुस्ताङले निर्माण गरेको यो पुल सम्झौता गरिएको निर्धारित समयभन्दा पहिले नै तयार भएको हो । आगामी साउन २० गतेभित्र काम सक्ने गरी दुई वर्षको लक्ष्यसहित निर्माण सुरु गरिए पनि निर्माण कम्पनीको सक्रियताका कारण समयअगावै काम सकिएको कार्यालयले जनाएको छ ।
पूर्वाधार विकास कार्यालयका इन्जिनियर सुरेश पाण्डेका अनुसार निर्माण कम्पनीको तदारुकताले गर्दा घरपझोङ गाउँपालिकाका पाँचवटै वडालाई जोड्ने चक्रपथअन्तर्गतको यो पुल चाँडै सम्पन्न हुन सकेको हो ।
यससँगै यसअघि विभिन्न कारणले छ पटकसम्म म्याद थपिएको १० दशमलव पाँच किलोमिटर लामो घरपझोङ चक्रपथ सडकको काम पनि चालु आर्थिक वर्षमै सकिएको छ । अब मुस्ताङ सदरमुकाम जोमसोमबाट ठिनी खोला हुँदै ढुम्बा ताल, छैरो, मार्फा, स्याङ र जोमसोम जोड्ने चक्रपथ पूर्ण रूपमा सञ्चालनमा आएको छ ।
कुल ४ करोड ४६ लाख रुपैयाँ लागतमा निर्माण भएको यो मोटरेबल पुल ३५ मिटर लामो र एक स्पानको छ । फुटपाथसहित यसको चौडाइ ८ दशमलव ४ मिटर रहेको छ । यसको निर्माण जिम्मा अमित अशेष जेभी कन्स्ट्रक्सनले लिएको थियो । निर्माण कार्य पूरा भएपछि अब एक वर्षको परीक्षण अवधिसहित पुल कार्यालयलाई हस्तान्तरण गर्ने तयारी भइरहेको निर्माण कम्पनीका प्रतिनिधि सुरेश भट्टराईले जानकारी दिए ।
पुल निर्माण भएसँगै मुक्तिनाथ दर्शन गरेर फर्कने पर्यटकहरूलाई प्रसिद्ध ढुम्बा ताल अवलोकन गर्न निकै सहज भएको छ । यसका साथै ढुम्बा, स्याङ, सम्लेलगायतका गाउँका किसानहरूलाई आफ्ना कृषि उपजहरू सजिलै बजारसम्म पुर्याउन मद्दत पुग्ने अपेक्षा गरिएको छ ।
यसअघि ठिनी खोलामा पक्की पुल नहुँदा वर्षायाममा स्थानीय बासिन्दा र पर्यटकहरूले आवतजावतमा ठुलो सास्ती भोग्नुपरेको थियो तर अब भने वर्षभरि नै ढुक्कसँग सवारीसाधन सञ्चालन गर्न सकिने भएको छ ।
भर्खरै
लोकप्रिय
