‘…त्यो दिन रातभर सुत्न सकिनँ’ ( भिडियो )

काठमाडौँ– अमेरिका-इजरायल र इरानबीचको युद्ध चर्किएको डेढ महिना भयो। गएको २८ फेब्रुअरीदेखि अमेरिका-इजरायलले इरानमाथि आक्रमण गरेपछि इरानले इजरायलसहित खाडी मुलुकका विभिन्न अमेरिकी सैन्य क्याम्पमा प्रतिआक्रमण सुरु गरेको थियो।

इरानको आक्रमणबाट युएई पनि प्रभावित भएको छ। यस कारण रोजगारी खोज्दै युएई पुगेका नेपालीहरू पनि प्रभावित भएका छन्। दैनिक विस्फोट हुने मिसाइलले नेपालीको सपना बिगारिरहेको छ।

युद्धका कारण काम छाडेर वा बिदा लिएर स्वदेश फर्किने नेपालीहरू बढिरहेका छन्। यसमध्ये एक हुन् चन्द्र सिर्पाइली। उनी युएईको राजधानी आवुधावीस्थित एक विमानस्थलमा कार्यरत रहेका थिए।

उनी पुगेको करिब एक वर्ष भएको थियो। युद्ध चर्किएपछि उनी महिना दिनलाई बिदा लिएर स्वदेश फर्किएका छन्। दुई हप्ताका लागि अमेरिका-इरान युद्ध रोकिएको समयमा अन्तर्राष्ट्रिय उडान सुरु भएपछि उनी त्यसकै मौका छोपी स्वदेश फिर्ति भएका हुन्।

जबदेखि अमेरिकाले इरानमाथि आक्रमण गर्‍यो, त्यसलगत्तै इरानले युएईमाथि पनि आक्रमण सुरु गरेको थियो। त्यसको साँची भएर फर्किएका छन्, सिर्पाइली पनि।

२८ फेब्रुअरीमा काम सकेर कोठा फर्किएपछि एक्कासी मोबाइलमा बजेको साइरनले उनी कम्ता त्रसित भएका थिएनन्। मोबाइलमा आएको एसएमएसमा इरानबाट मिसाइल आइरहेको जानकारी गराइएको थियो भने सुरक्षित रहन पनि भनिएको थियो।

मोबाइलमा साइरन बजेको केही मिनेटमै घर थर्काउने गरी मिसाइल आएको उनले प्रत्यक्ष देखे। ‘यहाँ नेपालमा त मिसाइल भन्ने देखेको हुँदैन नि। त्यहाँ त मिसाइल आउँदा घर नै थर्किने र झ्यालहरू थर्किने भएको थियो’, उनले सुनाए।

२८  फेब्रुअरीको रात आक्रमण र प्रतिआक्रमणका कारण आफू रातभर निदाउन नसकेको बताउँछन्।

प्रस्तुत छ, युएईमा उनले डेढ महिना भोगेको ती दिनसँग सम्बन्धित रहेर गरिएको भिडियो कुराकानी।

भिडियो: