मोरङ – पूर्वप्रधानमन्त्रीद्वय पुष्पकमल दाहाल र माधवकुमार नेपालले नेपाली कांग्रेसका नेता डा. शेखर कोइरालासँग भेटवार्ता गरेका छन्।
विराटनगरस्थित कोइराला निवासमा शुक्रबार बिहान दाहाल, नेपाल र कोइरालाबीच भेटवार्ता भएको हो। उनीहरूबीच करिब ४५ मिनेट कुराकानी भएको थियो।
राष्ट्रिय स्वतन्त्र पार्टी नेतृत्वको सरकारले पछिल्लो समय विभिन्न दलका नेताहरूलाई भ्रष्टाचार, सम्पत्ति शुद्धीकरणलगायतका मुद्दामा पक्राउ गर्ने थालेपछि नेताहरू सशंकित बनेका छन्। सरकारले सम्पत्ति शुद्धीकरण मुद्दामा सोमबार नेकपा एमालेका उपाध्यक्ष विष्णु पौडेललाई पक्राउ गरेको थियो।
यसैबीच सरकारले व्यवसायी अजय सुमार्गीको राहदानी रोक्का गरेपछि नेपाली कम्युनिष्ट पार्टीभित्र तरंग ल्याएको छ। यसै विषयमा कुराकानी गर्न नेकपाका संयोजक दाहाल र सहसंयोजक नेपाल कोइराला निवास पुगेको कोइरालानिकट स्रोतले जानकारी दियो।
व्यवसायी सुमार्गी दाहालनिकट हुन्। उनलाई सरकारले छानबिनको दायरामा ल्याउन खोजेपछि दाहालको बेचैनी बढेको हुनसक्ने स्रोतको भनाइ छ।
कोइरालासँगको भेटमा दाहालले सरकारविरुद्ध कांग्रेस, एमाले, नेकपालगायतका दलहरूले संयुक्त मोर्चा बनाए अघि बढ्नुपर्ने धारणा राखेका थिए।
भर्खरै
लोकप्रिय
