फुर्सद नहुँदा खाना खाने समयमा कविता लेख्छुः डा. यमबहादुर रोका

काठमाडौँ– वरिष्ठ न्यूरो सर्जन डा. यमबहादुर रोकाकाे कविता सङ्ग्रह ‘१०८ पोयमस्’ सार्वजनिक भएको छ।

डा. रोकाको पुस्तक ‘१०८ पोयमस्’ बिहीबार कुञ्ज थियटरमा एक समारोहबीच सार्वजनिक गरिएको हो।

विज्ञापन

पुस्तक सार्वजनिक कार्यक्रममा आफूले सानै उमेरमा कविता लेख्न थालेको भएता पनि एमबीबीएस पढ्न थालेपछि कविता लेखनलाई मनको एक कुनामा गाँठो पारेर राखेको उनले बताए। उनले भने,‘पढाईका कारण मैले कविता लेखनलाई  ब्रेक लगाएको थिएँ, जसलाई फेरि सुरु गरेको छु।’

मस्तिस्कको सर्जरी गर्ने डाक्टरलाई कविता कसरी फुर्ने गर्छ भनेर धेरैले सोध्ने गरेको उनले बताए। डा. रोकाका अनुसार कविता भनेको दिमागबाट होइन मनबाट निस्कनु पर्दछ। आफ्नो कार्य व्यस्तताका कारण कविता लेख्ने फुर्सद नहुने हुँदा खाना खाने समयमा लेख्ने गरेको उनले बताए। उनले भने,‘कहिले काहिँ त म राति उठेर समेत लेख्ने गर्छु।’

पुस्तकमा १०८ वटा कविता समावेश गरिएको बताउँदै डा. रोकाले भने,‘हिन्दु धर्ममा होस् वा अन्य कुनै धर्ममा होस् १०८ जप माला हुने गर्दछ, जसलाई अत्यन्तै पवित्र मानिन्छ, मेरा लागि यो पुस्तक पहिलो माला बन्न पुगेको छ’, उनले थपे, ‘कविता एउटा फिलिङ्स्, इमोसन्सलाई सजिलैसँग एस्प्रेस गर्ने माध्यम हो।

पिस बुक प्रा.लिले बजारमा ल्याएको पुस्तकको मुल्य ३९९ रुपैयाँ रहेको छ।

जेष्ठ १६, २०७६ मा प्रकाशित
प्रतिक्रिया दिनुहोस्