विभोद्वारा नेपालमा ‘भी-७०’ सार्वजनिक, ५० एमपीको जाइस सुपर टेलिफोटो क्यामरा मुख्य आकर्षण

काठमाडौं – विश्वविख्यात स्मार्टफोन ब्रान्ड विभो (vivo) ले आफ्नो चर्चित भी-सिरिज अन्तर्गतको नयाँ संस्करण विभो भी-७० (vivo V70) आज आधिकारिक रूपमा नेपाली बजारमा सार्वजनिक गरेको छ।

५० मेगापिक्सेलको जाइस (ZEISS) सुपर टेलिफोटो क्यामरासहित आएको यो फोन व्यावसायिक फोटोग्राफी र प्रिमियम डिजाइनमा केन्द्रित रहेको कम्पनीले जनाएको छ। एरोस्पेस-ग्रेडको शिल्पकारितामा आधारित यस फोनले प्रयोगकर्ताहरूलाई जुनसुकै दूरीबाट पनि स्पष्ट र गुणस्तरीय तस्बिर खिच्न सघाउने दाबी गरिएको छ।

यस फोनको सबैभन्दा बलियो पक्ष यसको क्यामरा प्रणाली हो। भी-७० मा पहिलो पटक ४के ६० एफपीएस (4K 60 fps) भिडियो रेकर्डिङ सुविधा उपलब्ध गराइएको छ, जसले गर्दा प्रयोगकर्ताले सिनेमाटिक गुणस्तरमा भिडियो खिच्न सक्छन्।

साथै, यसमा रहेको एआई स्टेज मोड र १ गुणादेखि २० गुणासम्मको जुम रेन्जले कन्सर्ट वा स्टेज कार्यक्रमहरूमा टाढाबाट पनि अनुहारको स्पष्ट विवरण र गहिराइ कैद गर्न मद्दत गर्दछ। जाइसको मल्टिफोकल पोट्रेट र बोकेह इफेक्टले पोट्रेट फोटोग्राफीलाई थप कलात्मक बनाउँछ।

डिजाइन र स्थायित्वका हिसाबले पनि भी-७० उत्कृष्ट रहेको छ। यसमा एरोस्पेस-ग्रेडको ६-सिरिज आल्मुनियम एलोय फ्रेम प्रयोग गरिएको छ, जसले गर्दा फोन हलुका हुनुका साथै मजबुत पनि छ।

फोनमा १.५के अल्ट्रा क्लियर ओलेड (OLED) डिस्प्ले र १२० हर्जको रिफ्रेस रेट रहेको छ। पावरको लागि यसमा ६५०० एमएएच (6500 mAh) को ब्लुभोल्ट ब्याट्री र ९० वाटको फ्ल्यास चार्ज सुविधा दिइएको छ। धुलो र पानीबाट बचाउन यसलाई आईपी६८ (IP68) र आईपी६९ (IP69) रेटिङ प्रदान गरिएको छ।

नेपाली बजारमा विभो भी-७० दुईवटा स्टोरेज भेरियन्टमा उपलब्ध छ। १२/२५६ जीबी संस्करणको मूल्य रु. ८३,९९९ र १२/५१२ जीबी संस्करणको मूल्य रु. ९४,९९९ तोकिएको छ।

ग्राहकहरूले यो फोन देशभरका विभो रिटेल स्टोर र दराज अनलाइनबाट खरिद गर्न सक्नेछन्। पहिलो बिक्रीको अवसरमा कम्पनीले आकर्षक अफरहरू पनि सार्वजनिक गरेको छ, जसमा पहिलो १,२०० ग्राहकले विभो बड्स एयर ३ नि:शुल्क पाउनेछन् भने चार भाग्यशाली ग्राहकले बम्पर उपहार स्वरूप ईभी स्कुटर जित्ने मौका पाउनेछन्।

उपभोक्ताहरूको सहजताका लागि १२ महिनाको शून्य प्रतिशत ईएमआई (EMI) सुविधा पनि उपलब्ध छ।