काठमाडौं- पूर्वाधार विकासमन्त्री सुनिल लम्सालले पूर्वी मधेशको लाइफलाइन मानिएका गौरवका आयोजनाहरूको प्रगति र गतिका बारेमा जानकारी लिएका छन्।
मन्त्री लम्साल नेतृत्वको उच्चस्तरीय टोलीले पूर्वी मधेशका विभिन्न जिल्लामा सञ्चालित ठूला तथा रणनीतिक विकास आयोजनाहरूको स्थलगत निरीक्षण एवं अनुगमन गरेको हो।
भ्रमणका क्रममा मन्त्री लम्सालको टोलीले काँकडभिट्टा-लौकही सडक आयोजनाका तीनवटै खण्ड र सप्तरीको कञ्चनपुरदेखि सिराहाको कमलासम्मको करिब ८७ किलोमिटर सडकलाई चार लेनमा स्तरोन्नति गर्ने कार्यको प्रगतिको प्रत्यक्ष समीक्षा गरेको छ।
साथै, टोलीले विगत १२ वर्षदेखि अलपत्र अवस्थामा रहेको हुलाकी राजमार्ग अन्तर्गतको कमला-कञ्चनपुर पुलको विशेष अवलोकन गर्दै यसको निकासका लागि चासो देखाएको छ।
निरीक्षणका क्रममा एशियाली विकास बैंक (एडिबी) र विश्व बैंकको लगानीमा सञ्चालित विभिन्न महत्त्वपूर्ण पूर्वाधार परियोजनाहरूको समेत अनुगमन गरिएको छ। यी आयोजनाहरू निर्धारित समयमै सम्पन्न गर्न मन्त्रालयले आवश्यक सहजीकरण, समन्वय तथा प्रभावकारी अनुगमनलाई उच्च प्राथमिकताका साथ अघि बढाएको छ।
मन्त्री लम्सालको यो सक्रियतासँगै वर्षौँदेखि अलपत्र परेका योजनाहरूले गति लिने र स्थानीयबासीको सास्ती हट्ने विश्वास गरिएको छ।
भर्खरै
लोकप्रिय
