- बाँसबारी माध्यमिक विद्यालयले १२७ अंकसहित दोस्रो चेयरमेन कप अन्तर स्कुल चेस च्याम्पियनसिपको उपाधि जित्यो र उपाधि रक्षा गर्यो।
- प्रतियोगितामा २२ विद्यालयका ३०४ खेलाडी सहभागी भए, जसलाई स्वीस लिग प्रणालीमा आधारित राखेर आयोजना गरियो।
- व्यक्तिगत स्पर्धामा बाँसबारीले विभिन्न क्लीनस्वीपहरू सहित थुप्रै प्रथम, दोस्रो र तेस्रो स्थानमा उत्कृष्ट प्रदर्शन गर्यो।
काठमाडौं- बाँसबारी माध्यमिक विद्यालयले काठमाडौं महानगरपालिका वडा नं. ४ द्वारा विहीबार आयोजित दोस्रो चेयरमेन कप अन्तर स्कुल चेस च्याम्पियनसिपको उपाधि जितेको छ। उसले एकछत्र वर्चस्व राख्दै उपाधि रक्षा गरेको हो ।
गल्र्स र ब्वाइजका ६ स्पर्धासमावेश दुई दिने प्रतियोगितामा बाँसबारीले सर्बाधिक एक सय २७ अंक जोड्दै मुख्य ट्रफी कब्जा गरेको हो। उसले गत वर्ष भएको पहिलो संस्करणको पनि उपाधि जितेको थियो । बालुवाटार प्यालेस ब्यांकेट एन्ड इभेन्ट्समा सञ्चालित प्रतियोगितामा यसपाली दुर्गा भवानी एकेडेमी ३७ अंक बटुल्दै उपविजेता भयो । महेन्द्र राष्ट्रिय मावि २८ अंकसहित तेस्रोमा रह्यो ।
हिमालयन चेस एकेडेमीको व्यवस्थापन रहेको प्रतियोगितामा कामपा ४ का वडाध्यक्ष दिनेश महर्जन, राष्ट्रिय खेलकुद परिषदकी बोर्ड सदस्य मोनालिशा खम्बूलगायतले ट्रफी, मेडल, प्रमाणपत्रलगायत पुरस्कार प्रदान गरेका थिए । स्वीस लिग प्रणालीको आधारमा आयोजित प्रतियोगितामा २२ विद्यालयका ३ सय ४ खेलाडी सहभागि थिए । उनीहरू कामपा ४ का स्थानीय र यस वडामा रहेका विद्यालयमा अध्ययनरत विद्यार्थी हुन् ।
व्यक्तिगत स्पर्धातर्फ कक्षा १ देखि ४ गल्र्समा बाँसबारी स्कुलले क्लीनस्वीप गर्यो । उसका विद्या ढुंगाना (४ अंक) पहिलो, सिमरन कार्की (३.५ अंक) दोस्रो र सुप्रिया तामाङ (३.५ अंक) तेस्रो भए । ब्वाइजतर्फ एनसीसीएस (नेसनल क्रिएटिभ को–एजुकेसनल स्कुल) का श्रेयांश सापकोटा (५ अंक) पहिलो, बाँसबारीका शिव थापा (४.५ अंक) र पञ्चकन्या आधारभूत स्कुलका सागर तामाङ (४ अंक) तेस्रोमा रहे ।
कक्षा ५ देखि ८ गल्र्सतर्फ पनि बाँसबारीले क्लीनस्वीप गर्यो । उसका सुप्रिया खत्री (६ अंक) पहिलो, कृतिका गुरुङ (५ अंक) दोस्रो र अलिशा थापा (५ अंक) तेस्रो स्थानमा रहे । ब्वाइजतर्फ दुर्गा भवानीका ओजोन तामाङ (७ अंक) पहिलो, बाँसबारीका सन्देश भट्ट (६ अंक) दोस्रो र दुर्गा भवानीका दिवज धमला (६ अंक) तेस्रो भए ।
त्यस्तै, कक्षा ९ देखि १२ गल्र्सतर्फ बाँसबारीकी अप्सरा खत्री (४.५ अंक) पहिलो, दुर्गा भवानीकी स्वष्तिका तामाङ (४ अंक) दोस्रो र आशिर्वाद सेकेन्डरी स्कुलकी निङ्वा पोमु (४ अंक) तेस्रो भए । ब्वाइजतर्फ साउथ वेस्टर्न कलेजका अभिवन पाण्डे (७ अंक) पहिलो, बाँसबारीका विन्दास अधिकारी (६ अंक) दोस्रो र किस्ट कलेजका अग्रज कटुवाल तेस्रो भए।
भर्खरै
लोकप्रिय
