काठमाडौँ – नेपालले नेदरल्याण्ड्समा हुने आईसीसी विश्वकप लिग-२ का लागि राष्ट्रिय टोलीको घोषणा गरेको छ।
विश्वकप लिग-२ मा बाँकी खेलहरू जित्नै पर्ने दबाबमा रहेको नेपालले रोहित पौडेलको कप्तानीमा १५ सदस्यीय टोलीको घोषणा गरेको हो।
नेपाल क्रिकेट संघले ५ खेलाडीलाई रिजर्भमा राखेको छ। घोषित टोलीमा दीपेन्द्रसिंह ऐरी उपकप्तानका रुपमा रहँदा सन्दीप लामिछाने, कुशल भुर्तेल, आसिफ शेख, इशान पाण्डे, आरिफ शेख, गुल्सन झा टोलीमा रहेका छन्।
त्यस्तै, करण केसी, सोमपाल कामी, नन्दन यादव, ललित राजवंशी, भीम शार्की, अर्जुन कुमाल र विनोद भण्डारी पनि टीममा समावेश छन्।
टोलीमा १५ सदस्यीय बाहेक सन्दीप जोरा, शाहब आलम, हेमन्त धामी, आकाश चन्द र युवराज खत्री रिजर्भमा रहेका छन्।
विश्वकप लिग-२ को श्रृंखलामा नेपाल २८ खेलबाट २४ अंक बनाएर पाँचौं स्थानमा रहेको छ। तालिकामा अमेरिका ४३ अंकका साथ शीर्ष स्थानमा रहँदा स्कटल्यान्ड दोस्रो तथा नेदरल्यान्ड्स तेस्रो र ओमान चौंथो स्थानमा रहेका छन्।
भर्खरै
लोकप्रिय
