काठमाडौँ – नेपाली राष्ट्रिय महिला फुटबल टोलीकी मिडफिल्डर रेनुका नगरकोटी सर्वोत्कृष्ट महिला फुटबल खेलाडी अवार्डबाट सम्मानित भएकी छन्।
योङ स्टार फाउण्डेसनले शनिबार एक कार्यक्रम आयोजना गर्दै रेनुकालाई वर्ष २०८२ को सर्वोत्कृष्ट महिला फुटबल खेलाडी अवार्डबाट सम्मान गरेको हो।
फाउन्डेसनका अध्यक्ष मोहनचन्द्र सिंहले अवार्ड र नगद एक लाख रुपैँयासहित सम्मान गरेका हुन्। रेनुका घरेलु फुटबलमा एपिएफबाट खेल्दै आइरहेकी छन्।
नेपाल खेलकुद पत्रकार मञ्च (एनएसजेएफ) सँगको सहकार्यमा योङ स्टार फाउण्डेसनले गत वर्षदेखि उत्कृष्ट महिला फुटबल खेलाडीलाई सम्मान गर्न सुरु गरेको हो। गत वर्ष यो अवार्ड प्रिती राईले जितेकी थिइन्।
घरेलु महिला फुटबलमा पुर्याएको योगदानको कदर गर्दै एक महिला खेलाडीलाई वर्षेनी सम्मान गर्ने योजनाअनुसार रेनुकालाई सम्मान गरिएको अध्यक्ष सिंहले बताए।
सन् २०१० देखि उनले नियमित रुपमा नेपाली महिला टिमबाट खेलिरहेकी छन्। राष्ट्रिय जर्सीमा उनले ६३ खेल खेलिसकेकी छन्। सम्मानित भएपछि रेनुकाले एकदमै खुशी लागेको प्रतिक्रिया दिइन्।
‘यो अवार्ड पाउँदा धेरै खुशी छु। परिवारकै कारण नेपाली फुटबलमा लगातार योगदान गर्न पाएको छु,’ रेनुकाले भनिन्, ‘यो अवार्डसहित सम्मान गर्नुभएकोमा फाउन्डेसनप्रति आभारी छु। यस्ता अवार्डले गर्दा लगातार खेलकुदमै लाग्न प्रेरित गरिरहेको हुन्छ।’
सोही कार्यक्रममा ‘अल्फा सिएरा माइक’ नामक पुस्तक विमोचन गरिएको छ। फाउण्डेसका अध्यक्ष सिंहले लेखेको किताबमा उनले आफ्नो जीवनको भागाइ, नेपाली उड्डयन, खेलकुद र मिडियासँग जोडिएका विषय समावेश गरेका छन्।
भर्खरै
लोकप्रिय
