फिफा विश्वकपअन्तर्गत अन्तिम १६ को खेलमा फुटबलका दुई चर्चित स्टार आज आमनेसामने हुँदै छन्। १० नम्बर जर्सी ‘डर्बी’ भिडन्त मानिएको यो खेलमा अर्जेन्टिनी स्टार लियोनेल मेसीलाई अफ्रिकन आइकोन मोहम्मद सलाहले चुनौती दिँदै छन्।
अर्जेन्टिनाका कप्तान लियोनेल मेसी र इजिप्टका स्टार मोहम्मद सलाहको प्रतिस्पर्धाले विश्वभरका समर्थकको ध्यान फेरि एकपटक आफूतिर तानेको छ। साविक विजेता अर्जेन्टिना र इतिहास रच्ने लक्ष्यमा रहेको इजिप्टबीचको यो भेट विश्वकपकै सबैभन्दा रोमाञ्चक नकआउट खेलमध्ये एक हुने अपेक्षा गरिएको छ।
अर्जेन्टिना प्रतियोगिताभर प्रत्येक खेलमा स्पष्ट दाबेदारका रूपमा उत्रिएको छ। तर पछिल्लो खेलमा अपेक्षाभन्दा कठिन संघर्ष गर्नुपरेपछि टोलीलाई हराउन असम्भव छ भन्ने धारणा केही कमजोर बनेको छ।
अर्कोतर्फ, इजिप्ट ऐतिहासिक यात्रामा छ। प्रतियोगितामा बाँकी रहेका दुई अफ्रिकी टोलीमध्ये एक इजिप्ट पहिलो पटक विश्वकपको क्वार्टरफाइनल पुग्ने लक्ष्यसहित मैदान उत्रँदै छ। अफ्रिकी महादेशको आशा बोकेको इजिप्टले विश्वका उत्कृष्ट टोलीसँग बराबरी प्रतिस्पर्धा गर्न सक्ने क्षमता देखाइसकेको छ।
अन्तिम १६ को रोमाञ्चक यात्रा
अर्जेन्टिनाले समूह ‘जे’ का तीनवटै खेल जित्दै ९ अंकसहित शीर्ष स्थानमा रहेर नकआउट चरणमा प्रवेश गरेको थियो। उसले अस्ट्रिया, अल्जेरिया र जोर्डनलाई पराजित गरेको थियो। अन्तिम ३२ को खेलमा भने विश्वकपमा पहिलो पटक सहभागी भएको केप भर्डेले अर्जेन्टिनालाई अतिरिक्त समयसम्म धकेलेको थियो। निकै प्रतिस्पर्धात्मक बनेको खेलमा अर्जेन्टिनाले अन्ततः ३–२ गोलको रोमाञ्चक जित निकाल्दै अन्तिम १६ मा स्थान बनायो।
इजिप्टले समूह ‘जी’ मा पाँच अंकसहित दोस्रो स्थान हासिल गर्यो। उसले बेल्जियम र इरानसँग बराबरी खेल्दै न्यूजिल्यान्डलाई पराजित गरेको थियो। अन्तिम ३२ मा अस्ट्रेलियासँग निर्धारित र अतिरिक्त समयसम्म १-१ को बराबरी भएपछि खेल पेनाल्टी सुटआउटमा पुगेको थियो, जहाँ इजिप्ट ४-२ ले विजयी भयो। यो इजिप्टको विश्वकप इतिहासमै पहिलो नकआउट जित थियो। सन् १९३४ मा पहिलो पटक विश्वकप खेलेको इजिप्ट अहिले नयाँ इतिहास लेख्ने संघारमा पुगेको छ।
मेसीलाई गोल्डेन बुट दौडमा अग्रता बनाउने मौका
जारी विश्वकपमा गोल्डेन बुट दौड निकै रोमाञ्चक बनेको छ। अर्जेन्टिनाका लियोनेल मेसी, फ्रान्सका केलियन एमबाप्पे र नर्वेका अर्लिङ हालान्डको समान सात-सात गोल रहेको छ। प्रतियोगितामा दुई असिस्टका कारण एमबाप्पे अग्रस्थानमा छन्।
मेसीले इजिप्टविरुद्ध पनि गोल गर्न सके उनी गोल्डेन बुट दौडमा एक्लै अग्रस्थानमा पुग्ने मात्र होइन, सन् १९३० मा गुइलेर्मो स्टाबिलेपछि एउटै विश्वकप संस्करणमा आठ गोल गर्ने दोस्रो अर्जेन्टिनी खेलाडी पनि बन्ने छन्।
तर, यस महत्वपूर्ण खेलअघि अर्जेन्टिनाका लागि थकान ठूलो चिन्ताको विषय बनेको छ। केप भर्डेविरुद्ध अमेरिकाको मियामीको गर्मीमा १२० मिनेट खेलेपछि टोलीलाई पर्याप्त विश्रामको समय मिलेको छैन। ३९ वर्षीय मेसीले पनि पूरा १२० मिनेट खेलेका थिए। पछिल्लो खेलपछि मेसीले आफू निकै थाकेको स्वीकार गर्दै टोलीले विपक्षीमाथि उच्च दबाब सिर्जना गर्न नसकेको बताएका थिए।
अर्कोतर्फ इजिप्टले अस्ट्रेलियाविरुद्धको खेलमा उत्कृष्ट रक्षात्मक प्रदर्शन गर्दै मोहम्मद सलाह र म्यानचेस्टर सिटीका फरवार्ड ओमर मरमुशमार्फत तीव्र काउन्टर याट्याक रणनीति अपनाएको थियो। अर्जेन्टिनाविरुद्ध पनि यही शैली दोहोरिन सक्ने सम्भावना छ।
यद्यपि, सलाहको फिटनेस इजिप्टका लागि ठूलो चासोको विषय बनेको छ। ह्यामस्ट्रिङको समस्याका कारण उनी अस्ट्रेलियाविरुद्ध पूर्ण रूपमा सहज देखिएका थिएनन्। १२० मिनेट लामो खेलमा उनी धेरै पटक पूरा गतिमा दौडिन हिच्किचाएको देखिएको थियो। अर्जेन्टिनाविरुद्ध इजिप्टले चमत्कार गर्न सफल हुने हो भने पूर्ण फिट सलाहको भूमिका अत्यन्त महत्वपूर्ण हुनेछ।
यदि इजिप्टले अर्जेन्टिनालाई पराजित गर्न सके विश्वकपको क्वार्टरफाइनल पुग्ने पाँचौँ अफ्रिकी राष्ट्र बन्ने छ। यसअघि क्यामरुन (१९९०), सेनेगल (२००२), घाना (२०१०) तथा मोरक्को (२०२२ र २०२६) ले अन्तिम आठमा स्थान बनाइसकेका छन्।
कसको सम्भावना बलियो?
अप्टाको सुपर कम्प्युटरका अनुसार निर्धारित ९० मिनेटभित्र अर्जेन्टिनाको जित्ने सम्भावना ६९.१ प्रतिशत छ भने इजिप्टको सम्भावना १२.३ प्रतिशत मात्र रहेको छ। खेल अतिरिक्त समयमा पुग्ने सम्भावना १८.५ प्रतिशत आँकलन गरिएको छ।
विजेताले कससँग खेल्ने?
अर्जेन्टिना र इजिप्टबीचको विजेताले क्वार्टरफाइनलमा स्वीट्जरल्यान्ड र कोलम्बियाबीचको विजेतासँग प्रतिस्पर्धा गर्नेछ। यो खेल जुलाई ११ मा अमेरिकाको क्यान्सस सिटीमा हुनेछ।
हेड-टु-हेड
विश्वकप इतिहासमा अर्जेन्टिना र इजिप्ट पहिलो पटक आमनेसामने हुन लागेका हुन्। दुवै टोलीबीच पछिल्लो भेट सन् २००८ मा कायरोमा भएको मैत्रीपूर्ण खेल थियो, जहाँ अर्जेन्टिनाले २-० को जित निकालेको थियो।
विश्वकपमा अफ्रिकी टोलीविरुद्ध अर्जेन्टिना लगातार आठ खेलदेखि अपराजित छ। यस संस्करणमै उसले अल्जेरियालाई ३-० र केप भर्डेलाई ३-२ ले हराइसकेको छ। विश्वकपको एउटै संस्करणमा तीन अफ्रिकी टोलीलाई पराजित गर्ने कीर्तिमान भने अहिलेसम्म कुनै पनि टोलीले बनाउन सकेको छैन।
टोलीको अवस्था
अर्जेन्टिनाका निकोलास गोन्जालेस (घुँडाको चोट) र फाकुन्डो मेडिना (शारीरिक असहजता) को खेल्ने सम्भावना अनिश्चित छ। इजिप्टका अहमद फतुह (मांसपेशीको चोट) र एल फतुह (ह्यामस्ट्रिङ) चोटका कारण बाहिर छन्।
सम्भावित सुरुआती टोली
अर्जेन्टिना (४–४–२): एमिलियानो मार्टिनेज, नाहुएल मोलिना, क्रिस्टियन रोमेरो, लिसान्द्रो मार्टिनेज, निकोलास ताग्लियाफिगो, रोड्रिगो डे पाउल, एलेक्सिस म्याक एलिस्टर, एन्जो फर्नान्डेज, थियागो आल्मादा, लियोनेल मेसी, लाउटारो मार्टिनेज।
इजिप्ट (४-२-३-१): मुस्तफा शोबेइर, मोहम्मद हानी, इब्राहिम, राबिया, हाफेज, फाथी, अतेया, आशोर, मोहम्मद सलाह, ओमर मरमुश, जिको।
भर्खरै
लोकप्रिय
