मौसममा सुधार : अब ठूलो र लगातार वर्षाको सम्भावना छैन – मौसमविद्

काठमाडौँ – भारी वर्षा गराउने मौसमी प्रणाली बाहिरिएसँगै मौसममा सुधार आउन थालेको जल तथा मौसम पूर्वानुमान महाशाखाले जनाएको छ।

मौसमविद् वरुण पौडेलका अनुसार गएको आइतबारदेखि देशका विभिन्न क्षेत्रमा सक्रिय रहेको झरी तथा भारी वर्षा गराउने मौसमी प्रणाली बुधबार राति बाहिरिएको हो।

‘भारी वा झरी पार्ने मौसमी प्रणाली रातिदेखि बाहिरिएको छ। अब ठूलो र लगातार पानी पर्दैन अर्को ठूलो मौसमी प्रणाली नभित्रिएसम्म’, उनले भने, ‘तत्काललाई ठूलो मौसमी प्रणाली भित्रिने सम्भावना पनि देखिएको छैन।’

उनका अनुसार ठूलो पानी पर्ने न्यून चापीय प्रणाली तथा पश्चिमी वायुको प्रणालीको संयुक्त प्रभाव हटेको हो। ‘तर त्यो प्रणालीले छोडेर गएको जलवाष्पयुक्त हावाको प्रभावले देशका विभिन्न स्थानमा बदली र छिटफुटदेखि हल्का पानी भने पर्न सक्छ। आत्तिनु भने पर्दैन’, मौसमविद् पौडेलले थपे, ‘अब जनजीवन क्रमिक रुपमा सामान्य हुने गरी मौसममा सुधार आउने देखिन्छ।’

लगातारको भारी वर्षाका कारण विशेष गरी कर्णाली र सुदूर पश्चिममा भित्र्याउने बेलाको धानबालीमा ठूलो क्षति भएको छ। ‘बिहीबारदेखि किसानहरुले पनि केही राहत महसुस गर्न पाउनु हुनेछ’, उनले भने, ‘हल्का पानी परे पनि झरी पर्दैन। घाम लाग्नेछ।’

अहिले भारतको बिहारमा रहेको न्यून चापीय प्रणाली र पश्चिमी वायु प्रणालीको सामान्य प्रभावमात्रै नेपालमा रहेको उनले बताए।

हाल देशभर आंशिकदेखि सामान्य बदली रही प्रदेश १ र बागमती प्रदेशका एक वा दुई स्थानमा हल्का वर्षा भइरहेको छ।

बिहीबार दिउँसो देशभर आंशिकदेखि सामान्य बदली रहने छ। प्रदेश १, बागमती र गण्डकी प्रदेशका थोरै स्थानमा र बाँकी प्रदेशका एक–दुई स्थानमा मेघगर्जन र चट्याङसहित हल्का वर्षाको सम्भावना रहेको महाशाखाले जनाएको छ।

यस्तै राति पनि देशभर आंशिकदेखि सामान्य बदली रहने छ। प्रदेश नं १ र गण्डकी प्रदेशका थोरै स्थानमा र बाँकी प्रदेशका एक वा दुई स्थानमा मेघगर्जन र चट्याङसहित हल्का वर्षाको सम्भावना छ।

यो पनि पढ्नुहोस्

धानका पाँजामा देखिएको विपदको कारुणिक दृश्यका कारण र कमजोरी के होला?